Лондон, 25 јули 2014 (МИА) - Во холандската јавност се појавија барања за протерување на ќерката на рускиот претседател Владимир Путин од Холандија, откриваат лондонските весници.
Марија Путина привремено престојува во Холандија, па од властите во Хаг се бара ќерката на рускиот претседател да биде депортирана во Москва. Тоа би требало да биде реакција на Холандија за политиката на Владимир Путин, но повеќе како казна за руската „вина“ при соборувањето на малезискиот патнички авион, над југоисточна Украина, во кој најголемиот број од патниците беа Холанѓани.
Тешкиот инцидент од минатата недела, за кој меѓусебно се обвинуваат проруските бунтовници и украинските власти, предизвика натамошно интензивирање на антируската и антипутин кампања во британските медиуми, како и барањата за нови и уште построги санкции против Москва.
Лондонски „Тајмс“ во својот коментар бара продолжување на притисокот и „згмечувањето“ на Путин, оценувајќи дека тоа не само што ќе помогне за олабавување на украинската криза, туку ќе ја покрене руската елита за да се избори за отворање на нивната земја.
Ваквото барање доаѓа по тврдењето на НАТО дека Алијансата располага со докази за продолженото дотурање на руско оружје за сепаратистите во источна Украина. Според НАТО, преку руската граница бунтовниците примиле ново вооружување во изминатите неколку недели, а дека тоа било сторено и по соборувањето на малезискиот „Боинг 777“ во кој загинаа 298 лица.
ЕУ претходно ја предупреди Русија дека мора се престане со вооружувањето на проруските сепаратисти или Москва ќе се соочи со потешки санкции кои директно ќе ја погодат руската економија, а особено финанасискиот сектор.
Експерти во лондонски Сити, за кои се верува дека знаат што содржи предлогoт на заострените санкции, велат дека тие ќе ги погодат државните банки и секторот за извозот на гас и нафта од Русија, но се вели дека блокирањето на банкарските трансакции и државните обврзници ќе му нанесе голема штета и на британскиот финансиски сектор, а посебно на лондонскиот финансиски центар Сити.
Најострите британски критичари на Путин и Русија сепак сметаат дека „не смее да се попушти“ и бараат од премиерот Дејвид Камерон да почне со казнување на руските олигарси во Велика Британија, замрзнувајќи го нивниот имот и средствата што ги имаат во лондонските банки. Еден од оние кои би се нашол на удар на една таква мерка би бил Роман Абрамович, сопственик на фудбалскиот клуб „Челзи“ кој важи за близок сојузник на рускиот претседател.