Брисел, 4 август 2014 (МИА) - Поранешниот претседател на Украина Виктор Јанукович и неговите синови Олександар и Виктор, како и украинскиот бизнисмен Сергиј Курченко, во Судот на ЕУ поднесоа жалби за санкциите што против нив ги воведе Европската унија, пренесе ИТАР-ТАСС.
Јанукович, неговите синови и Курченко бараат санкциите да бидат повлечени. Санкциите против нив беа воведени на 5 март и на 15 април, а со нив им се забранува патување и им се замрзнуваат банкарските сметки во земјите членки на Унијата.
Во Европскиот суд се поднесени вкупно четири жалби во кои четворицата тврдат дека санкциите не биле донесени врз основа на доволно докази, туку единствено од политички причини.
Јанукович, освен тоа, се жали и на фактот дека во постапката со санкциите Европскиот совет го нарекувал поранешен украински претседател.