Зголемени стравувањата на Чесите од РусијаПрага, 24 октомври 2014 (МИА) - Во врска со ситуацијата во Украина, значително се зголеми бројот на Чесите кои веруваат дека Русија е опасност за демократијата во земјата, како и за иднината воопшто, покажува најновото истражување на агенцијата СТЕМ.
За 65 проценти од испитаниците, Русија е закана за иднината, додека минатата година слична загриженост покажаа само 36 проценти од Чесите.
Меѓу левоориентираните граѓани, од Русија се плашат 58 проценти, 64 отсто од оние со центристичка политичка ориентација и дури 74 проценти од десничарско ориентирани граѓани, се вели во анкетата.
Како што јави дописникот на МИА од Прага, според 80 проценти од анкетираните, украинскиот конфликт го загрозува мирот во Европа.
Мнозинството (71 проценти) се согласува со ставот на чешката дипломатија која поддржува зачувување на интегритетот на Украина.
Анкетата покажува дека граѓаните во Чешка не веруваат оти санкциите на ЕУ ќе придонесат за ставање крај на конфликтот.
Напротив, тие се плашат дека санкциите за казнување на Русија ќе им наштетат на земјоделците во земјата.
|