Женева, 30 октомври 2014 (МИА) - Швајцарската полиција во куќата на еден пензионер пронашла вистински воен арсенал, односно 2.400 парчиња оружје и неколку десетици сандаци со муниција.
Според пишувањето на локалниот печат, во неговата куќа во Утерзен, во близина на Интерлакен, на западот од Швајцарија, претресот траел цели три дена, а го изведувала група од 20 лица, од кои двајца војници.
Околностите под кои пензионерот собрал толкаво количество оружје се уште не се познати.
Истрагата е се уште во тек, соопштија денеска швајцарското обвинителство и кантоналната полиција.
Сопственикот на импресивниот арсенал, чиј идентитет не се открива, е приведен и распрашан во полициската станица и истиот ден е пуштен на слобода.
Оружјето е пронајдено во подрум и сите четири ката од неговата куќа.
Полицијата запленила 1.311 пушки и 1.186 парчиња рачно оружје, како и 53 сандаци муниција.