Париз, 31 октомври 2014 (МИА) - Пожарот во трказлезната зграда на Радио Франс, позната под името „Мезон де ла Радио“ или „Дом на Радиото“ е ставен под контрола, изјави портпаролот на париските пожарникари Габриел Плус.
- Во интервенцијата беа вклучени шеесетина пожарникари со 16 противпожани возила опремени со пумпи кои овозможуваат да се снабдуваат со вода од хидрантите на ова висока зграда, во борбата против огнот со цел тој да биде ставен под контрола, што е веќе направено од наша страна. Ви потврдувам дека во моментов кога ви зборувам нема жртви, нагласи тој.
Пожарот избувна по експлозиите кои биле слушнати на седмиот и осмиот кат на зградата. Тој не се проширил на целите каотив, а чадот што излегувал од зградата бил видлив од сите страни на Париз.
Како што јави дописникот на МИА од Париз, веќе подолго време се работи на реконструкцијата на оваа зграда, изградена во 1963 година на брегот од Сена во 16-от париски арондисман. Таа најпрво беше седиште на француската радио и телевизија, а сега само на француското радио.
В моментов на осмиот кат се вади азбестот, кој беше ставен и широко се користеше на времето како противпожарна заштита, но поради неговте канцерогени својства сега се отстранува од сите јавни згради.
Сите програми на француското национално радио Франс Интер, Франс Инфо, Франс Култур, Франс Музик, ФИП, Мов - јавниот сервис беа прекинати нешто по 12 часот и 47 минути, а околу 13 часот и 30 минути дел од ежурните новинари се вратија на работните места, но по наредба на префектурата на Париз, тие повторно беа евакуирани. Програмите повторно започнаа да се емитуваат од 14 часот и 30 минути.