Промоција на аудиоизданието „Непокор“ со 12 стари револуционерни песни

Скопје, 29 јуни 2015 (МИА) - Во Музејот на македонската борба за државност и самостојност вечер официјално ќе биде промовирано аудиоизданието  „Непокор“ - проект во продукција на Македонската радио телевизија, во соработка и со поддршка на Министерството за култура.

Целта на проектот е афирмирање и поддршка на македонската музика, творештво и музичка сцена. Дел од песните веќе беа  телевизиски промовирани во ревијалниот дел на фестивалот „Цветници 2015“.

„Непокор“ содржи 12 стари револуционерни песни од македонската музичка ризница во аранжман и обработка на Никола Мицевски, а посветени на дел од најпознатите  личности и настани од македонското револуционерно минато  од Илинденскиот период,  опеани во народот и оставени како духовно и културно наследство.

Стручен консултант за оригиналност и изворност на текстовите од песните е проф. д-р Марко Китевски. Песните ги изведуваат: Александар Тарабунов, Влатко Лозановски, Андријана Јаневска, Кирил Митовски, Маријан Стојановски, Ламбе Алабакоски, Мишко Крстевски, Зуица Лазова, Сузана Спасовска, Анастасија Петреска и женскиот хор при ДМБУЦ „Илија Николовски Луј“.