Општина Богданци со низок степен на наплата на данок на имот

Гевгелија, 6 јули 2015 (МИА) - Во првата половина од годинава општина Богданци од издадени 2.484 решенија за данок на имот на физички лица реализирала приходи во износ од 625.166 денари со степен на наплата кој изнесува само 26 отсто, како и 406.407 денари од правни лица со нешто повисок степен на наплата од околу 35 отсто.

Заради зголемување на наплатата, општина Богданци се вклучи во активностите за развивање политики за финансирање на општините и јакнење на капацитетите за финансиско управување и следење на состојбата за напредок на наплатата на данокот на недвижен имот.

Од општината соопштија дека администрацијата и понатаму работи на подигање на свеста на граѓаните за обврската за плаќање на данокот на имот со укажување дека повисоката наплата значи подобрување на нивното секојдневие, односно повисок квалитет на нивниот живот.