Европски проект за заштита на културно историското наследство во Новаци

Новаци, 7 јули 2015 (МИА) - Општина Новаци потпиша договор со Делегацијата на ЕУ во Република Македонија за продолжување на проектот „Жива историја, жива природа 2“ чија вредност е околу 300.000 евра.

Од секторот за односи со јавност на општина Новаци информираат дека до крајот на годината ќе почне комплетно реновирање на партерното уредување на рекреативниот парк на река Коњарка кај Скочивир, внатрешна реконструкција на црквата Св.Димитрија во с.Градешница, деминирање на дел од Мариовско и други активности.

- Обезбедивме континуитет на проектот за заштита на културно, историското и природното наследство на општина Новаци. Проектот се реализира со општина Алмопиа одсоседна Грција и е дел од Програмата за прекугранична соработка меѓу Македонија и Грција, посочуваат од тамошната локална самоуправа.

Во првиот дел од проектот, општина Новаци изврши реконструкција на  куќата на Калеш Анѓа во селото Старавина, црквата Св. Димитрија во Градешница, мостот и воденицата во с.Зовиќ, а со знаци беа обележани историска, природна и комбинирана туристичка патека на различни излетнички места во Мариово.