Нема задржувања на мигрантите кои со воз доѓаат од Гевгелија на железничката станица Табановце.
Жителите на ова село, вечерва информираа дека штом пристигне воз со мигранти на железничката станица Табановце, тие мошне кратко се задржуваат, обично, одмараат, се освежуваат, јадат и го продолжуваат патот кон соседна Србија.
Во текот на претходниот ден, во 16 часот пристигнале околу 200, а во 21 часот, помеѓу 300 и 400 мигранти. Од невладините организации очекуваат да пристигне воз околу 01.30 часот.
Од Црвен Крст Куманово укажуваат дека мигрантите на железничката станица не се задржуваат, бидејќи тука не чекаат на документи. На железничката станица има екипи на Црвен Крст и на невладини организации.
Поставени се монтажни објекти каде што мигрантите можат да се засолнат, а денеска функционираат и тоалетите кои деновиве ги поставија екипи на Црвен Крст и на УНХЦР.
Од Итна помош Куманово потврдуваат дека во текот на денешниот и вчерашниот ден не биле повикани за каква било интервенција на железничката станица.