Се расчистува речното корито и се прави проценка на штетите во Куманово

Куманово,13 октомври 2015 (МИА) - Општина Куманово да продолжи со расчистување на речното корито, а утре општинската комисија за проценка на штети да  објави оглас согласно кој граѓаните ќе можат да ги пријават штетите од неoдамнешната поплава.
 
Ова се двете донесени одлуки кои ги презентираше градоначалникот на Куманово, Зоран Дамјановски, по одржаниот работен состанок  со заменик министерот за транспорт и врски, Неметула Халими, пратеници и локалните служби .
 
На состанокот, посочи Дамјановски, било разговарано и за пронаоѓање решение за решавање на проблемот со излевање на реката,со кој се соочуваат граѓаните кои живеат околку градскиот и стадионот „Башкими“.
 
Заменик министерот за транспорт и врски Халими по одржаниот состанок изјави дека тука се дојдени да помогнат при решавање на проблемите, особено инфраструктурните кои ги засегаат граѓаните на општина Куманово.
 
На состанокот, изјави Дамјановски, бил постигнат и договор за натамошни активности меѓу кои и средба со претставници од Министерствата за транспорт и врски и животна средина и просторно планирање, како и од Дирекцијата за води, општинските претпријатија и водостопанство „Кумановско-липковско поле“, со цел да се изнајде конечно решение за проблемот на граѓаните со излевање на реката, на околу 150 куќи, лоцирани околу градскиот и стадионот „Башкими“.
 
 - Проблемот е хроничен и датира од донесениот ГУП од 2002,план кој веќе не е во употреба и не дава можност за решавање на теренскиот проблем.Имаме узурпација на дивоградби во тој регион кои со Законот за легализација се во функција, така што можноста за изградба на профил на реката кој е предвиден со Законот за урбано-просторно планирање не е можно да се изведе, рече Дамјановски.