Скопје, 21 октомври 2015 (МИА) - Ако до почетокот на ноември не се формира Државната изборна комисија и не се реализира Законот за специјалниот обвинител ќе се доведе во прашање валидноста на договорот и одржувањето на изборите, изјавил попладнево на брифинг со новинари белгискиот експерт Питер Ванхоуте кој посредува во разговорите на работните групи за имплементација на Договорот од Пржино.
Со оглед дека не важат веќе крајни рокови и по вчерашните преговори, според него, се поставува прашањето дали учесниците сакаат договор. Според него, проблемот е во системот кој е партизиран и во нефункционалноста и неефикасноста на институциите.
Тој оценил и дека поради пробивањето на роковите очекува да биде критичен и извештајот на ЕК за напредокот на земјата.
Ванхауте најави дека ќе ги продолжи преговорите со работните групи, а најдоцна утре се очекува Изборниот законик да се спроведе во Парламент. Доколку нема напредок во разговорите, тогаш, вели, можно е да следува остра реакција од ЕУ и САД.