Во Пехчево изградена велосипедска патека, како дел од Програмата за зачувување на природатаПехчево, 25 ноември 2015 (МИА) - Во Пехчево во рамки на проектот „Промовирање интегриран пристап за одржливо управување со карактеристичните природни ресурси во Пехчево“, како дел од Програмата за зачувување на природата во Македонија поддржана од Швајцарската агенција за развој и соработка, е изградена велосипедска патека долга 10 километри. Ирена Каракутовска, координатор на проектот од НВО Милеуконтакт Македонија денеска во Пехчево ги презентираше резултатите од проектот кој обезбедува услови за одржливо управување со природните ресурси во Општина Пехчево. - Патеката е долга 10 километри и таа го поврзува Пехчево со познатите туристички места, „Вртена скала“, „Делибови кашчи“ и „Јудови ливади“, каде се наоѓа ендемскиот вид на инсектојадното растение Drosera rotundifolia. Патеката е маркирана, поставени се информативни табли, патокази, канти за отпад по нејзината должина, изготвена е мапа, а за потребите на туристите обучени се 7 локални водичи кои ќе им помагаат на туристите во запознавањето на Пехчево и природните раритети во овој дел од Малешевијата, рече Каракутовска. Проектот го имплементира Здружението за одржлив развој Милиеуконтакт Македонија, организација со која Пехчево соработува веќе 16 години. За првиот човек на оваа организација Игор Славковски, реализацијата на овој проект отвора можности за идни проекти од областа на туризмот кои ќе донесат и дополнителни приходи на локалното население - Задоволство е да се соработува со Пехчево, овде локалното население максимално се вложува во реализацијата на проектите и верувам дека со велосипедската патека направивме предуслови за иницирање на идни активности од областа на туризмот, рече Славковски. За Пехчево, истакна градоначалникот Игор Поповски, како мала општина која се бори да се најде на туристичката мапа, како чиста и еколошка средина со бројни природни раритети, изградбата на оваа патека дава нов квалитет во понудата за туристите. - Со пријателите од „Милеуконтакт Македонија“ изминативе години работиме во многу проекти, а целта е заедничка, да дадеме квалитетна основа за развој на туризмот како економска гранка која ќе даде и бенефит и за самото население и за општината, рече Поповски. Инаку, проектот се работеше изминатите 11 месеци, а чини околу 500 илјади денари и е дел од малите проекти на Програмата за зачувување на природата. Досега преку Програмата за зачувување на природата во двата повика се поддржани 20 проекти на здруженија и 14 проекти на општините од Брегалничкиот слив, со вкупна вредност од 20 милиони денари.
|