Мост во хрватскиот град Самобор именуван по Велес

Велес, 30 ноември 2015 (МИА) - Изминатиот викенд во збратимениот град Самобор во Република Хрватска свечено е откриена натписната плоча на мост кој го носи името на градот Велес.

Како што денеска информира за медиумите Дуњамин Мехмед портпарол на Општина Велес, плочата на која пишува „Мост града Велеса“, заеднички ја откриле  градоначалникот на Самобор Крешо Бељак и градоначалникот на Велес Славчо Чадиев.
 
- Трајната поврзаност на двата града влече корени од далечната 1939 година, кога Кочо Рацин основоположникот на македонската современа поезија во печатницата на Драгутин Шпулер во Самобор ја отпечати збирката поезија „Бели мугри” во четири илјади примероци, потсети Мехмед.
 
Повелбата за трајна соработка меѓу двата града Самобор и Велес  е потпишана во 1977 година. Во таа насока е и одлуката донесена во 2012 година за именување на мост по името на пријателскиот град Велес.
 
Инаку посетата на градоначалникот Чадиев била  искористена и за средба со членовите на македонската заедница, а кои живеат во Република Хрватска.