Најмногу дожд наврна во Лазарополе, 5 литри на метар квадратен

Скопје, 2 мај 2016 (МИА) - Најмногу дожд во последните девет часа, до 16 часот, наврна во Лазарополе. Според мерењата на Управата за хидрометеоролошки работи, во Лазарополе е наврнат воден талог од пет литри на метар квадратен, следува Маврово со три, Виница, Претор, Битола, Тетово и Охрид со два и Струмица со еден литар на метар квадратен.

До крајот на денот времето ќе биде облачно со врнежи од дожд. Доцна попладне ќе има пообилни врнежи во западните, а во ноќните часови во источните делови, каде се очекува локално да наврнат околу 50 литри на метар квадратен.

Времето утре ќе биде претежно облачно со повремени врнежи од дожд, со слаб до умерен интензитет. До крајот на денот врнежите речиси секаде ќе престанат. Ќе дува умерен, вдолж Повардарието повремено засилен северозападен ветер. 

И в среда ќе се задржи променливо облачно, ветеровито и релативно свежо време со повремени врнежи од дожд со послаб интензитет. В четврток ќе има делумно стабилизирање на времето, а од петок ќе биде малку потопло со локален краткотраен дожд и ретки грмежи.