Реакција на ВМРО-ДПМНЕ на соопштението на Кире Наумов Скопје, 4 мај 2016 (МИА) - Дополнителниот заменик министер за финансии Кире Наумов и СДСМ се обидуваат да ја манипулираат јавноста изнесувајќи невистинити факти за зголемување на каматната стапка на тримесечните државни хартии од вредност, а целта е да создадат незадоволство и паника, реагира ВМРО-ДПМНЕ на соопштението на Наумов.
- Каматната стапка на тримесечните државни хартии од вредност со девизна клаузула е намалена во проспектот кој денеска е објавен. Така, ако на последната аукција на која беа издадени тримесечни ДХВ со девизна клаузула во март 2013 каматната стапка беше 3,60 проценти, сега е 1,50 проценти. Според ова сосема е јасно кој сака да долева масло во зејтинот и кој сака да создаде вештачка криза. Кире Наумов и СДСМ постојано се обидуваат да создадат паника, но во тоа нема да успеат, соопшти владејачката партија.
ВМРО-ДПМНЕ посочува дека Македонија во моментов е меѓу петте најмалку задолжени земји во Европа, а дека вчера излезе и пролетната прогноза на ЕК според која Македонија во 2016 и 2017 ќе забележи економски раст од 3,5 проценти и заедно со Ирска, Романија, Малта и со Полска, ќе го има најдобриот резултат во ЕУ, каде просекот е поставен на 1,8 проценти.
|