СВР Охрид: Лажна дојава за бомба во близина на училиште во Струга

Струга, 25 мај 2016 (МИА) – Стручни полициски тимови од анти-тероризам при СВР Охрид и полициски службеници од полициската станица во Струга по добиената дојава за бомба во близина на струшкото Основно училиште „Браќа Миладиновци“ констатираа дека нема експлозивна направа.

СВР Охрид соопшти дека немало експлозивна направа, која може да предизвика општа опасност поставена во патничко моторно возило во Струга на улицата „Јово Стефаноски Риле“.

- Во полициската станица во Струга, денеска во 9 часот и 30 минути добиена е информација дека во патнички автомобил марка „Нисан примера“ со бугарски регистарски ознаки, има направа која може да предизвика општа опасност. По добиената информација, полициски екипи ги презедоа сите безбедносни мерки за обезбедување на поширокиот простор каде беше паркирано патничкото возило и извршија преглед врз него, изјави портпаролот на СВР Охрид Стефан Димоски.

Директорот на училиштето Шелким Алиу информираше дека полициски службеници дошле во училиштето и кажале да се евакуираат учениците поради дојава за бомба во близина на училиштето, по што наставата била прекината.

- Дојдоа надлежните од МВР од Струга и ни рекоа без паника да ги евакуирате децата од задните врати. Ги евакуиравме без никаков проблем, изјави за МИА Алиу.

Редовната настава на учениците продолжила со втората смена.