ФАЦ: Логично е на Македонија да и се одземе препораката

Берлин, 30 мај  2016 (МИА) - Германскиот весник „Франкфуртер алгемајне цајтунг“ во анализа за состојбите за Македонија вели дека би било логично со оглед на проблемите што ги има земјата со корупцијата, правната држава и медиумите, да и се одземе препораката за почеток на преговори за членство во ЕУ добиена пред 7 години, јави дописникот на МИА од Берлин.
 
Според весникот, Македонија се соочува со низа проблеми, од внатрешна политичка криза, преку блокада на процесите на евроинтеграција од страна на Грција и запирање на напредокот во спроведување на реформите. За ФАЦ сите овие проблеми ја претвораат Македонија во земја во која што и да стори ЕУ ќе биде погрешно.

 
Во својата анализа „Франкфуртер алгемајне цајтунг“ цитира изјава на лидерот на ДПА според кого Македонија проблемите со својот „имунолошки систем“ може да ги реши со влез во НАТО и надминување на етничкиот конфликт меѓу Македонците и Албанците.“ За да се решат сите проблеми за Тачи е доволно да се најде решение за спорот со Грција по што земјата би влегла во НАТО што може да ги смири Албанците кои нема да се плашат за своите права, а за Македонците ќе ја отстрани опасноста дека земјата може да се подели. За лидерот на ДПА причина за националистичката политика кај владата е грчката блокада во евроатланските интеграции по што „Македонците се обидуваат во 21 век да градат држава од 19 век која што Албанците не можат да ја прифатат“... Членството во НАТО е значајно и за поранешниот амбасадор и преговарач за името Никола Димитров кој смета дека со тоа земјата ќе добие на сигурност.
 
Во анализата се говори и за партијата ДУИ која што е на власт без прекин 15 години и која што во тој период изградила систем на клиентелизам кој е идентичен како оној на македонската страна. Според весникот, лидерот на ДУИ, Али Ахмети, нема никаков интерес за надминување на системот на етничка поделба затоа што тоа му овозможува услови за учество во владата без разлика кој победува на изборите кај македонскиот ентитет.