Проштална средба на евроамбасадорот Орав со Заев

Скопје, 25 јули 2016 (МИА) - Лидерот на СДСМ, Зоран Заев придружуван од заменик претседателката Радмила Шекеринска и генералниот секретар Оливер Спасовски денеска се сретна со евроамбасадорот во заминување Аиво Орав. 

Како што соопшти СДСМ, Заев му се заблагодарил на Орав за, како што е наведено, неговите заложби за обновување на демократските процеси во Македонија и посебно за неговата ангажираност во напорите за разврска на длабоката политичка криза во Македонија.

- На средбата е заеднички констатирано дека следните предвремени парламентарни избори мора да бидат регуларни и тие избори, за кои е потребно да се испочитуваат роковите и да се одржат според предвиденото во декември, се сериозен предизвик за Македонија, дали ќе зачекори кон стабилна иднина. Спротивната опција е непосакувана и ризична и за граѓаните и за државата од секој аспект, се посочува во соопштението од партијата.

Заев му подарил на Орав слики од ликовниот уметник Илија Прокопиев.