„In Nomine“ - трета стихозбирка од Стефан МарковскиСкопје, 26 јули 2016 (МИА) - Во едицијата „Ѓерѓеф“ на издавачката куќа „Македонска реч“ од Скопје излезе од печат нова поетска збирка од Стефан Марковски, насловена „In Nomine“ која содржи 40-ина песни.
- Во „In Nomine“ Стефан Марковски не ја следи главната поетичка структура на неговата генерација во која доминира иронијата како основна стилска фигура и светоглед на реалноста. Напротив, тој е склоп кон чисто лирскиот асоцијативен тип поезија. Нему пред сѐ му е битен, како што би рекол Карлајл, метафизичкиот квалитет на песната, на кого во европската модерна посебно инсистираа симболистите, пишува во рецензијата критичарот Евтим Клетников.
„In Nomine“ е трета стихозбирка на Марковски. Досега ги објавил: „Еднонасочно“ (роман, 2009), „Апеирон“ (поезија, 2010), „За некои спомени на онаа некогашност“ (поезија, 2010), „Хиерархиска еволуција на свеста“ (Психологија и теорија на ум, 2012), „Мета(де)конструкција и општа филозофија“ (Филозофија, 2012), „Среќата е глагол“ (Психологија и филозофија, 2013) и „Продавачот на ветар и магла и други приказни“ (Раскази и драмски текст, 2015).
Марковски е постдипломец на Факултетот за драмски уметности – насока Филмско и ТВ-сценарио. Член е на Друштвото на писателите на Македонија. Негови дела се преведени и објавени на неколку јазици. За своето творештвое добитник на домашни и на странски награди и признанија.
|