„М-Нав“ и „Еуроконтрол“ потпишаа Договор за наплата на терминални услуги

Охрид, 25 август 2016 (МИА) - Претставници на Европската организација за безбедност и воздушна пловидба „Еуроконтрол“ и на Македонската агенција за воздухопловна навигација „М-Нав“ денеска во Охрид потпишаа Договор за поблиска меѓусебна соработка во делот на наплатата на терминалните надоместоци.

Живко Попоски, претседател на Управен одбор на „М-Нав“, појасни дека потпишувањето на овој договор претставува континуитет во соработката на двете институции во прибирањето и наплатата на средствата за дадените услуги, бидејќи 90 проценти од средствата наплатени од прелетите се опфатени со претходните договори.

- Досега прибирањето на средствата за реализираните услуги се вршеше во готовина, преку операторот „ТАВ“ и потоа со сметкопотврда се префрлаа на нашата сметка. Сега финансиските трансакции ќе бидат многу почисти и побезбедни од многу аспекти. Автоматски се ослободуваат клиентите од носење пари во готово, сите средства ќе се трансферираат преку сметка, што значи олеснето, транспарентно, побезбедно деловно работење и секако поефикасна наплата, рече Попоски.

Генералниот директор на „Еуроконтрол“ Франк Бренер рече дека Република Македонија, една од 41-те членки на Европската организација за навигациски услуги, придобивките од денеска потпишаниот договор ќе ги добие преку олеснета и ефикасна деловна комуникација со корисниците на услугите што ги дава Агенцијата, истовремено олеснувајќи ги соодветните административни процедури за самите клиенти.

- „Еуроконтрол“ преку Канцеларијата за наплата на прелети ќе врши наплата на надоместоците за терминалните услуги во корист на давателот на услугите, во случајот македонската навигација. Секако нашата улога тука е помош во наплатата на дадените услуги за сите наши членки, така што даваталите на услуги во иднина нема да мораат да се грижат околу наплатата на терминалните надоместоци. Сите средства собрани од наплатата на надоместоците потоа се префрлаат на давателот на услугите за користење на воздушниот простор, рече Бренер, нагласувајќи дека денеска потпишаниот договор е само логична последица на интензивната и одлична деловна соработка на „Еуроконтрол“ и Македонската агенција за цивилна воздухопловна навигација.

Горан Јандреовски, директор на Агенцијата за цивилно воздухопловство на Република Македонија, истакна дека потпишувањето на денешниот договор е резултат на активностите што Агенцијата заедно со Министерството за транспорт и врски ги спроведува за унапредувње на соработката на македонските и европските институции задолжени за областа на цивилната воздушна пловодба.

- Нашата соработка со „Еуроконтрол“ е мошне интензивна. Вакви проекти ќе следат и во иднина, се со цел унапредување на индустријата во Република Македонија, рече Јандреовски.