Заменик-претседателката на СДСМ Радмила Шекеринска денеска оцени дека на македонското образование му е потребна темелна реформа и оти фокусот треба да биде ставен на оние вештини коишто ќе им помогнат на учениците подоцна полесно да најдат работа.
- Ќе ги намалиме бројот на часови и на предмети во основно и во средно образование, а фокусот ќе го ставиме на математичките и на јазичните вештитни кај децата во Република Македонија. Денеска децата и во основно и во средно училиште се преоптоварени со многу содржини и многу предмети, рече Шекеринска.
Според неа, резултат од големиот број на предмети што се изучуваат во училиштата се површно знаење и незадоволство кај учениците, родителите и кај наставниците.
- Денеска, и на домашниот, и на меѓународниот пазар на труд, не е доволен дури ниту еден странски јазик да знаете, потребно е и повеќе странски јазици да знаете, потребно е многу математика, потребно е многу разбирање на различни проблеми со коишто се соочуваме во секојдневниот свет, рече Шекеринска.