Одбележување еден век од раѓањето на писателот Радослав Петковски

Скопје, 28 септември 2016 (МИА) - Во Мултумедијалниот културен центар „Матица ексклузив“ вечер ќе биде одбележана стогодишнината   од раѓањето на  писателот Радослав Петковски (Ресен, 1916 - Белград, 1955).

По тој повод ќе биде промовирана книга од овој автор, насловена „Поезија, раскази и драмски текстови“ подготвена од проф. д-р Нада Петковска, во издание на „Панили“, а за неговиот живот и дело ќе говори проф. д-р Весна Мојсова-Чепишевска.

Радослав Петковски во 1940 година во Белград завршил Правен факултет.  Работел   како   помошник   кај   адвокат   во   Охрид, како библиотекар во градската библиотека и како секретар на општината Охрид. Во 1949 година бил избран за судија на околискиот суд во Охрид.

Во својот краток живот објавил поетски, прозни и драмски текстови. Неговата книга раскази „Рибарот Климе“ беше задолжителна лектира.