Заврши реконструкцијата на водоводната мрежа во штипската населба „Пребег“

Штип 26 октомври 2016 (МИА) - Штипското комунално претпријатие „Исар“ денеска заврши со реконструкцијата на водоводната мрежа на улицата „Вељко Влаховиќ“ во штипската населба Пребег.

Директорот на ЈП „Исар“, Ангел Бојаџиев посочи дека реконструкцијата на застарената водоводна мрежа на оваа улица е од големо значење, бидејќи на овој дел од градот ќе се шири и новата индустриска зона, а и граѓаните од станбните згради, фирмите и угостителските објекти ќе имаат квалитетно водоснабдување.

- На оваа улица месечно имавме по три до четири дефекти, бидејќи цевките беа застарени, поставени во минатото и не беа функционални. За многу кратко време, за 12 дена успеавме да замениме 500 метри водоводна линија, во вредност од 30.000 евра. Оваа инвестиција е на ЈП „Исар“, изјави Бојаџиев.

Раководителот на работна единица Водовод и канализација во ЈП „Исар“, Бранко Горгиев појасни дека со реконструкцијата е направен и прекоп со цел новите индустрсики објекти кои се градат од десната страна на улицата полесно да бидат приклучени на водоводната мрежа.

- За следната година во населбата Пребег во програмата на ЈП „Исар“ предвидена е реконструкција на улиците „Славонска Пожега“ и „Скоевска“, најави Горгиев.

Во текот на наредните денови општина Штип ќе ја асфалтира улицата „Вељко Влаховиќ“, каде што се реконструираше водоводната мрежа.