Скопје, 14 јануари 2017 (МИА) - Сега е важно политичките партии да преговараат, да најдат начин да формираат коалициска влада. Мошне е битно политичките лидери да работат што е можно побрзо и поефикасно и да постигнат договор, за ова да не биде предолг процес, изјави заменик-помошникот државен секретар за Европа и Евроазија во Стејт департментот, Хојт Ји.
– САД, секако дека го почитуваат суверенитетот на Македонија и можноста партиите да ја донесат таа одлука без мешање однадвор. Нашата улога во моментов е да набљудуваме, да понудиме совет за одредени принципи – како на пример, сметаме дека е важно новата влада да ги поддржува меѓународните определби, вклучувајќи ги и одредбите од Договорот од Пржино, партиите да стават јасно на знаење дека се определени да го почитуваат Уставот на државата, човековите права, да ги почитуваат институциите на државата, вклучувајќи ги и институциите како СЈО, да го почитуваат владеењето на правото и целите на граѓаните за интеграција во остатокот од Европа, да се приклучат во НАТО, изјави Ји за Гласот на Америка на македонски јазик.
Тој, како што рече, верува дека политичките партии ќе се фокусираат на целите на граѓаните, а не на тесногради политички интереси, и дека ќе бидат во можност да постигнат договор за коалициска влада, којашто ќе може да соработува со ЕУ, со САД, со други меѓународни партнери, за земјата да се придвижи кон поголема интеграција.