Општина Кавадарци: Локалната патна мрежа без сериозни проблеми

Кавадарци, 17 јануари 2017 (МИА) - Зимава локалната патна мрежа во општина Кавадарци функционира без сериозни проблеми. Снежната покривка од 15 до 60 сантиметри која падна на територијата на општината не предизвика посериозни проблеми во сообраќајот, информираа денеска од општинската Служба за односи со јавноста.
Првата интервенција, посочуваат, службата за зимско одржување ја направила паралелно со првите посериозни врнежи од снег, при што улиците од прва и втора категорија во Кавадарци, како и локалните патишта до низинските села веднаш беа проодни и оспособени за сообраќај во зимски услови.
- Со брзата и навремена интервенција на механизацијата за неполни дванаест часови се пробија и оспособија за сообраќај и локалните патни правци кон ридско планинските села. Досега по улиците и патиштата се фрлени 60 тони сол и 150 кубни метри ризла, информираат од општината.
Нагласуваат дека најоддалечените села Рожден Мрежичко и Фариш, потоа патните правци кон селата од Бошавијата Страгово, Крњево, Чемерсо, Бохула, Горна и Долна Бошава, Бојанчиште и Конопиште не се отсечени од Кавадрци, а во екстремни случаи не повеќе од 10 часа.
- Иста е ситуацијата и со локалниот пат до одморалиштето „Михајлово“ кое иако се наоѓа на 1.400 метри надморска височина, патот кон сместувачките капацитети на одморалиштето и индивидуалните објекти е прооден во секој момент дури и при високи врнежи од снег, што порано не беше случај, се вели во информацијатаод општина Кавадарци.