Скопје, 20 февруари 2017 (МИА) - СДСМ денеска обвини дека четири месеци на Клиниката за гинекологија се отпуштаат бебиња без примена вакцина против туберкулоза.
- Иако е најпрепорачливо новороденчињата да бидат вакцинирани против туберкулоза веднаш по раѓањето, родителите не можат да ги однесат на вакцина бебињата ниту во диспанзерите. Според информациите што ги имаме нема БЦГ вакцини ни во поликлиниката Битпазар, ни во Идадија, ниту во поликлиниката Букурешт, а дури ни во поголемите градови ширум Македонија, изјави д-р Ангелчо Андоновски, член на Комисијата за здравство на СДСМ.
Според СДСМ, министерот за здравство е информиран дека нема вакви вакцини, а пред три недели кога од оваа Клиника требало да биде отпуштено бебе на советник на министерот за здравство, била донесена доза од вакцината со која биле вакцинирани и други 30 новороденчиња.