Скопје, 6 март 2017 (МИА) - СДСМ денеска преку соопштение наведува дека Уставот обезбедува многу јасни решенија за излез од политичката криза, истакнувајќи дека претседателот Ѓорге Иванов мора да го даде мандатот на претседателот на СДСМ, Зоран Заев за формирање на новата влада во Македонија.
Според СДСМ, „лидерот на ВМРО-ДПМНЕ Никола Груевски не е поважен од Уставот и неприфатливо и недозволиво е да поттикнува поделби во Македонија и да користи насилства само затоа што граѓаните избраа промени, а тој ја загуби власта“.
- Недозволиво е и од страна на Иванов, само за да го спаси Груевски, да го крши Уставот и да ја пролонгира политичката криза на штета на граѓаните. Ако Иванов и Груевски навистина ја сакаат Македонија како што велат, тогаш тие би го почитувале Уставот и ќе се повлечат, наведува во соопштението СДСМ.
Според СДСМ, граѓаните во Македонија не сакаат нови парламентарни избори затоа што, стои во соопштението, тие веќе го поддржаа концептот едно општество за сите, сакаат да живеат заедно, без поделби, во правна држава којашто обезбедува квалитетен живот за сите.