Скопје, 2 мај 2017 (МИА) - Лидерот на СДСМ Зоран Заев најавува дека мнозинството ќе ја реализира обврската пред граѓаните за избор на нова влада и оти тоа ќе биде направено со почитување на Деловникот, Уставот и законите.
Во денешното интервју за Дојче Веле, лидерот на СДСМ вели дека тоа ќе биде направено со смиреност и со поддршката од домашната и од меѓународната јавност.
Во однос на тоа дали очекува повторно насилство при трансферот на власта, Заев со оценка дека во Собранието бил направен организиран обид за убиство на пратеници и насилство врз новинари и вработени во законодавниот дом.
- Извршија тешко кривично дело, терористичко загрозување на уставниот поредок и безбедноста. Ние покажавме како достоиствено се бранат државните интереси и како се сака Македонија. Не дозволивме да ја реализираат намерата да направат хаос во државата, меѓуетнички судир, судир на граѓани од иста етничка заедница, државен удар, за да отворат простор за налудничавото сценарио Иванов да прогласи воена состојба. Тоа им беше намерата. Со оваа група околу Груевски никој не може да биде на чисто што тие планираат. Но јас знам што ние нема да дозволиме. Нема да им го дозволиме сценариото. Мудро, со почитување на Деловникот, Уставот и законите, со смиреност, и наша и на граѓаните, со поддршката и од домашната, но и од меѓународната јавност, ќе ја реализираме нашата обврска за избор на новата Влада на граѓаните. Иако институциите се партизирани, знаеме дека во нив постојат професионалци кои нема да тргнат во кршење на Уставот и законите и против интересите на граѓаните, вели Заев.
Прашан дали лидерот на ВМРО-ДПМНЕ Никола Груевски директно или индиректно од него барал гаранции за амнестија, Заев со одговор дека амнестија нема да има.