Министерот Фазлиу ги посети волонтерите на Мировниот корпус во Теарце

Скопје, 18 декември 2017 (МИА) - Двајцата волонтери на Мировниот корпус кои една година престојуваат во општина Теарце, воспоставија одлична соработка со локалното население, се интегрираа и создадоа блиски релации. Ако сите пристапиме на ист начин во градењето на односите меѓу луѓето, без ограничувања, и ако секој направи нешто корисно за локалната заедница, барем педесет отсто од проблемите ќе бидат решени, рече министерот за локална самоуправа Сухејл Фазлиу.
Фазлиу денеска, во придружба на директорот на Мировниот корпус Марк Ханафин, имаше средба со градоначалникот и можност директно да се запознае со волонтерите Андерсон и Шефер.
- Ме воодушеви адаптираноста на средината и блиските релации што волонтерите ги имаат создадено со локалното население. Запознавањето меѓу себе и на различни култури, традиција и начин на живеење е многу важно за меѓусебно разбирање и почитување. Ова е пример како може различни култури толку брзо да се зближат и да соработуваат и за една година да ги научат и јазиците на локалното население, албанскиот и македонскиот, потенцира министерот.
Градоначалникот Исени информира дека двајцата волонтери се целосно интегрирани во локалната заедница и дека даваат исклучителна поддршка на локалното население во изучувањето на англискиот јазик и организирање локални волонтерски активности, но помагаат и во подготвувањето апликации за проекти на општината.
Ханафин истакна дека има многу позитивни примери на соработка меѓу волонтерите од Мировниот корпус и општините, како што се Богданци, Кичево, Теарце, Новаци и други. - Мировниот корпус има волонтери во 47 општини кои одлично соработуваат со месното население и со невладините организации и ние ќе настојуваме тој број да се прошири зашто тие се одлично прифатени од месното население и локалната заедница, рече Ханафин.
Мировниот корпус е американска владина организација која е присутна во Македонија од 1996 година со повеќе од 200 доброволци што престојувале во педесетина општини.