Градоначалниците на Скопје и на Атина, Петре Шилегов и Јоргос Каминис, утре во грчката престолнина ќе имаат официјална средба. По тој повод денеска во заедничка колумна повикуваат на зближување на двата града и затворање на отворените прашања меѓу Македонија и Грција.
Колумна е објавена во денешните изданија на македонскиот дневен весник „Слободен печат“ и грчкиот дневен весник „Та Неа“.
- Во текот на изминатите неколку недели беа направени важни чекори и беше направен моментум за решавање на спорот кој ги дели нашите држави со децении. Ова кулминираше со неодамнешниот конструктивен состанок помеѓу двајцата премиери во Давос, што доведе до изрази на надеж и охрабрување кај нашите народи дека оваа историска можност нема да се пропушти повторно.
Ние, како градоначалници на главните градови на двете земји, ги здружуваме нашите гласови и го поддржуваме процесот што мора да води кон остварливо решение, а не кон ново разочарување, посочува Шилегов и Каминис во колумната.
Двајцата градоначалници го изнесоа своето разбирање дека активирањето на преговорите создава стравови и несигурност кај големи делови од населението во двете земји, и дека таквите негативни чувства и грижи треба да се почитуваат, внимателно да се решаваат и да не се игнорираат.
- Не смееме да дозволиме националистичките гласови во двете страни да ги искористат овие чувства во обидот да го загрозат конечниот договор и повторно да ја утврдат нашата судбина и нашата заедничка иднина, не само како соседи, туку и како европски граѓани, нагласуваат Шилегов и Каминис.
Тие како локални лидери, соочени со моќта на градовите што станува сѐ поголема, појаснуваат дека треба да се справат со повеќе предизвици што се суштински за секојдневниот живот на нивните сограѓани. Се посочуваат како одговорни за обезбедување широк опсег на јавни услуги и должности за да ги направат своите градови привлечни и подобри места за живеење.
- Денес, градовите во Европа ги делат најдобрите практики, соработуваат на различни нивоа, дизајнираат интегрирани политики, промовираат глобални цели и се вклучуваат во директен дијалог со европските институции и меѓународни организации. Градовите имаат храброст да преземат понатамошни одговорности и да развијат тесна интеракција со активното граѓанско општество, секогаш во насока на подобрување на животните услови и донесување конкретни решенија за проблемите на граѓаните, согласни се Шилегов и Каминис.
Градоначалниците на двата главни града се решени да изградат повеќе мостови на соработка и да бидат движечка сила за приближување на двете соседни земји. Сметаат дека е непобитен фактот дека бизнисите во Скопје и во Атина сѐ повеќе се поврзуваат, дека постои културна размена, младите студираат на исти универзитети, а нивните сограѓани посетуваат исти туристички дестинации во двете земји и развиваат меѓусебно пријателство.
На крајот од колумната тие додаваат дека како градоначалници на главните градови, решиле да го отворат патот кон поблиска соработка и силно ги охрабруваат нивните национални влади да го вложат тој дополнителен напор потребен за да не се пропушти новата можност и да се постигне договор, кој им служи на основните интереси на двете земји и гарантира подобра иднина за сите нивни сограѓани.
Градоначалникот на Атина Каминис, во меѓувреме, во интервју за радиото „Тема“ најави дека наскоро планира возвратна посета на Скопје.