Универзитетската клиника за урологија денеска ја промовираше новата, целосно реновирана болничка инфраструктура. На настанот беше кажано дека ова е дел од широк инвестициски и реформски циклус, што опфаќа модернизација и унапредување на здравствените услуги, условите за работа и достојни услови за пациентите. Во присуство на директорот на Клиниката - Башким Шабани, претседателот на Владата - Христијан Мицкоски, министерот за здравство Азир Алиу, директорот на Фондот за здравствено осигурување - Сашо Клековски, заменик претседател на Владата задолжен за добро владеење Арбен Фетаи и заменик министерот за здравство Јовица Андовски, беше истакнато дека се зголемени медицинскиот тим, современите практики и хуманата грижа за пациентите.
- Во изминатите месеци, Клиниката успешно реализираше низа проекти насочени кон подобрување на условите за работа, унапредување на медицинските услуги и подигнување на квалитетот на грижата за пациентите, беше речено на средбата.
Целосно било реновирано болничкото одделение со вкупна инвестиција од 300 илјади евра. Од оваа сума, 100 илјади евра биле обезбедени од фондовската сметка, 100 илјади преку донации, а останатите 100 илјади евра од сопствени средства на Клиниката.
Просториите биле целосно трансформирани во современи болнички соби, уредени како апартмани.
- Секоја соба е опремена со нови болнички кревети, ЛЦД телевизори, нови тоалети, клима-уреди и бактериолошки прочистувачи на воздух. Климатизацијата на целиот простор создаде значително похумани услови за пациентите, особено во текот на летните месеци кога температурите се високи, а болничкиот престој може да биде непријатен, се нагласи на настанот.
Притоа, како особено значаен беше потенцирано и хуманиот гест на вработените од Клиниката.
- Тие се откажаа од субвенциите за службени мобилни телефони, во вредност од 500.000 денари. Наместо тоа, Клиниката со овие средства купи две машини за перење алишта и 18 клима уреди за болничките соби. Овој чин, според раководството е суштинска посветеност за доброто на пациентите, беше посочено на средбата.
Притоа се додаде дека Клиниката за урологија била опремена со два нови апарати. Апарат за ендоскопски третман за калкулоза на уринарен тракт „Олумпус солтива премиум“, еден од најсовремените и најдобри апарати за третман на калкулоза и вториот апарат, лапароскопски столб од фирмата „Олимпус премиум“, еден од најдобрите апарати за лапароскопија.
Во завршна фаза била набавка на БК фјужн апарат за биопсија на простата, единствен во регионот за таргет биопсија на простата. Апаратот чинел 200 илјади евра од кои 100 илјади биле донации, а 100 илјади евра од буџетска сметка.
Медицинската експертиза на Клиниката значително била зајакната и со воведувањето на три нови хируршки техники.
- Во последната година, започнаа да се имплантираат артифициелни уринарни сфинктери и да се вградуваат пенилни протези - ригидни и семиригидни, а во финална фаза е и имплементацијата на третата, високо специјализирана метода - сакрална неуромодулација. Со тоа, Клиниката стана сертифициран центар за овие интервенции, кои досега беа достапни само во странство. Денес, овие хируршки процедури, кои се практикуваат во најразвиените медицински центри во светот, успешно се изведуваат и во Скопје, се подвлече на денешниот настан.
Покрај новите техники, Клиниката отворила и просторија за полуинтензивно лекување, опремена со монитори за следење на виталните параметри, во која ќе се третираат потешките пациенти.
Човечкиот ресурс останувал во фокусот на развојните политики.
- По направената анализа на потребите од медицински персонал, неодамна беа вработени 22 медицински сестри, болничари и хигиеничарки, кои претходно беа ангажирани со договор на дело. Со тоа, Клиниката ја зајакна кадровската основа и овозможи поквалитетна грижа за пациентите. Паралелно, се подготвува и нова програма за вработување доктори и медицински персонал, со цел задржување на стручниот кадар во државата и континуирано подобрување на квалитетот на услугите, беше споделено на средбата.
Во следната фаза од развојот, започнувало реновирањето на Центарот за трансплантација на бубрези и Центарот за калкулоза.
- Во план е да се набави нов апарат за третман на камења на уринарниот тракт, а ќе се изгради и нова хируршка сала за ендоскопски интервенции. Целта е централизација на третманот на уринарните камења на едно место, каде пациентите ќе добијат најсовремени решенија, без да се упатуваат на другите клиники. Воедно, новиот Центар за трансплантација ќе располага и со просторија за дијализа, што ќе овозможи трансплантираните пациенти да останат во рамки на клиниката, без да се препраќаат до Клиниката за нефрологија, се информираше денеска на Клиниката.
Притоа се истакна Универзитетската клиника за урологија, со овие значајни инвестиции, кадровски зајакнувања и воведување на современи медицински практики, се позиционирала како национален лидер во областа на урологијата.
Директорот Шабани ги презентираше и плановите за развој на Центарот за трансплантација и Центарот за калкулоза, со фокус на унапредување на трансплантацијата на бубрези како заеднички предизвик.
Директорот на Фондот за здравствено осигурување, Клековски нагласи дека Клиниката за урологија е пример за моделот што го промовираат Владата, здравствените власти и Фондот: зголемено финансирање на јавно здравствените установи што овозможува редовно одржување на просторот и опремата, како и условни финансии од ФЗО за воведување нови методи. Тој додаде дека новите методи се дел од пакетот за поддршка на пациенти со рак, кој опфаќа и методи на Клиниката за уво, нос и грло, Клиниката за торакална хирургија и Клиниката за пластична хирургија.
- Овој проект ја потврдува посветеноста на Клиниката за урологија кон подобрување на здравствената грижа и воведување иновативни решенија за пациентите, истакна Клековски.
Министерот Алиу рече дека оваа клиника, инфраструктурно изгледа навистина според сите европски стандарди. Технологиите и методологиите биле во склад со потребите на пациентите и во склад со европските протоколи.
- Чекор по чекор, здравството станува сè поблиску до секој, изјави министерот, најавувајќи презентација и на други успешни проекти.
Премиерот Мицкоски исто така изрази задоволство од ова, како што рече, многу позитивно дело, импресивно нешто. Тој истакна дека и во иднина ќе се продолжи со ваквата динамика.
- Главен фокус ни е развојот на државата, а во тој фокус значајно место, едно од клучните, има и здравството. Рекордни средства од буџетот се издвојуваат за здравството, подвлече Мицкоски.
Тој најави и нови инвестиции во здравството, во клиничката болница во Штип, заедно со медицинскиот факултет и студентскиот дом, болницата во Кичево заедно со здравствениот дом, реконструкција на клиничката болница во Тетово и слично.
Премиерот посака што помалку пациенти кои се соочуваат со проблеми и што повеќе здрави луѓе. Но, ако веќе има пациенти со проблеми, да добијат европски здравствени услуги, какви што заслужуваат.