Црногорската полиција е во потрага по 18-годишниот македонски државјанин Андреј Танасковски кој е осомничен за обид за убиство на Марко Љубиша Кан (56) од Будва, информираат црногорските медиуми.
-Полицијата во соработка со Високото државно обвинителство од Подгорица пронајде докази и го расветли обидот за убиство на Марко Љубиша Кан што се случи на 7 август годинава во комплексот хотели „Маестрал“ во Будва. Со преземање на оперативни и тактички мерки, како и со прибрани форензички докази полициските службеници за кратко време го идентификуваа извршителот на ова тешко кривично дело. Се работи за лицето А.Т., државјанин на Северна Македонија, соопштила Црногорската полиција.
Тој се сомничи дека испукал два проектили во правец на Кан, кој се здобил со повреди во делот на главата по што се дал во бегство во непознат правец.
Полицијата ги предупредува граѓаните дека секое свесно прикривање на информации за движењето или престојот на Танасковски, вклучително и давање на услуга за сместување може да претставува кривично дело - помош на сторител по извршено кривично дело што подлежи на законска одговорност.