Во Чифлик, општина Чешиново-Облешево осветена прва црква Кочани, 18 мај (МИА) - Во присуство на голем број граѓани од Чифлик и околните населени места во општина Чешиново-Облешево денеска е осветена новоизградената црква посветена на “Св. Наум Охридски”.
Чинот на осветувањето го изврши поглаварот на Македонската православна црква г.г. Стефан во сослужение на митрополите на Брегалничката и Дебарско-кичевската епархија г. Иларион и г. Тимотеј.
Црквата во Чифлик заедно со фрескоживописот што го изработија Павлинка и Столе Илиеви, е изградена за пет години со средства од мештаните. Станува збор за прва црква подигната во Чифлик.
На свечениот чин на осветувањето присуствуваше и носителот на листа во Изборната единица број 3, на коалицијата „За подобра Македонија“, Влатко Ѓорчев, кој денеска ги одработуваше предизборните активности во населените места во оваа општина.
|