Струмица, 1 јуни (МИА) - По земјотресот што се случи во 10 часот и 03 минути и се почуствува и во струмичкиот регион, струмичани претпладнето панично ги напуштија своите домови и поради страв од повторни потреси денот го поминуваат пред зградите во дворовите и во парковите.
Поради информациите што ги пласираа одредени медиуми дека попладнево меѓу 13 и 17 часот се очекува нов земјотрес со катастрофални последици наставата во првата смена во основните и во средните училишта беше прекината и учениците беа ослободени од часови, додека втората смена воопшто не започна со работа. Исто така, испразнети се градинките и специјалните школски установи, а од работа до крајот на денот се ослободени вработените во локалната самоуправа, во културните, воспитно образовните и во другите државни и локални институции.
Демантот на Сеизмолошката опсерваторија при Природно-математичкиот факултет во Скопје дека не се очекуваат нови посериозни потреси и дека нема место за паника сепак не ги успокои граѓаните на Струмица. Најголем дел од нив повеќе им веруваат на гласините и се уште се надвор од зградите, стравувајќи од нови земјотреси.