Скопје, 14 септември (МИА) - Напредокот на Македонија во изминатиот период е охрабрувачки и треба да се продолжи со овие напори, изјави денеска евроамбасадорот Ерван Фуере.
Запрашан за тоа какви забелешки може Македонија да очекува во извештајот за напредокот на земјата, кој официјално ќе биде затворен утре, а објавен на 14 октомври, Фуере рече дека е премногу рано да се шпекулира околу заклучоците на Европската комисија.
- Она што можам да го кажам е дека напредокот во изминатиот период, особено во последните неколку недели е охрабрувачки. Би му оддал признание на вицепремиерот Васко Наумовски и на Парламентот за напорите во овој процес, како и за трендот на градење политички консензус. Се надеваме дека ова ќе продолжи и по објавувањето на извештајот. Се уште има време за донесување одлуки кои можат позитивно да влијаат на извештајот и ние сме во очекување на финалната фаза, изјави евроамбасадорот.
Фуере нагласи дека треба да се продолжи со овие напори. - На полето на визна либерализација сите барани реформи беа успешно спроведени од страна на македонската Влада. Тоа покажува дека ако сите институции се посветени на нешто може да се постигне успех на крајот. Ова е позитивна порака за македонските граѓани бидејќи покажува дека Владата посветува повеќе внимание на граѓаните во процесот на интеграција во ЕУ и претставува позитивен знак за иднината, смета евроамбасадорот кој денеска присуствуваше на завршната конференција на твининг проектот: Преглед на националното трудово законодавство.