Скопје, 15 септември (МИА) - Деветгодишниот син на членот на Нова демократија Фатмир Етеми, кој вчера беше киднапиран во непосредна близина на чајџилницата „Блус“ во Чаир, е ослободен, а против две лица осомничени за киднапирањето е распишана интерна потерница.
Малолетниот А.Е., како што денеска соопшти МВР, е ослободен вчера околу 21 часот и 30 минути на крстосницата на улицата „Босна и Херцеговина“ со булеварот „Словенија“ по што тој се јавил од мобилен телефон. Во присуство на неговите родители е извршен разговор со него и е утврдено дека бил однесен во напуштена куќа на булеварот „Македонско-косовска бригада“ во Визбегово, во близина на местото каде што под кирија престојувал еден од грабнувачите. Од извршените прегледи и разговорот констатирано е дека детето не е физички малтретирано од страна на грабнувачите.
Главни осомничени за грабнувањето се А.Б.(1990) од с. Тисовица и А.С.(1990) од Скопје, кои при извршениот претрес во нивните домови не се пронајдени, поради што по нив е распишана интерна потрага. Двајцата и се познати на полицијата по поситни кривични дела.
Се уште се истражува и мотивот на грабнувањето, иако според првичните претпоставки станува збор за изнуда на пари со оглед на тоа што таткото на детето добил еден заканувачки повик да подготви пари, а дополнителни насоки, како што било најавено, требало да му бидат дадени денеска.
По целосно документирање на случајот против двајцата осомничени ќе биде поднесена соодветна пријава.
Синот на Етеми беше киднапиран вчера околу 16 часот и 20 минути од страна на две непознати лица додека возел велосипед со негов врсник.