Истанбул/Атина, 9 октомври (МИА) - Новиот грчки премиер и министер за надворешни работи Јоргос Папандреу денеска на маргините од состанокот на Процесот за соработка во ЈИЕ во Истанбул, првпат ќе има тет-а-тет средби со шефот на македонската дипломатија Антонио Милошоски и со турскиот премиер Реџеп Таип Ердоган, најавуваат денеска медиумите во Грција.
Известувачот на МИА од Истанбул, јави дека од македонската страна има расположение за средба, но засега нема официјална потврда и од грчка страна за евентуални тет-а-тет разговори Милошоски - Папандреу.
Македонскиот министер за надворешни работи по изборот на новата грчка Влада изјави дека македонските државни претставници се отворени за соработка и за директни контакти со грчките власти.
- Ќе ни биде задоволство ако можеме на билатерално или на мултилатерално ниво да имаме средби со нашите грчки колеги и да разговараме за прашања од заеднички интерес, и ако новата грчка Влада оцени дека е целисходно да има почести контакти и поблизок однос на билатерален план, рече Милошоски.
Подготвеност за поблиска билатерална соработка со новата грчка Влада искажа и премиерот Никола Груевски во честитката до Папандреу по повод неговото именување за премиер на Грција.