Истанбул, 10 октомври (МИА) – Во деновите што доаѓаат Република Македонија го очекува извештајот за напредокот на ЕК, којшто се надеваме ќе биде во тонот на нашите постигнувања и оти ќе резултира со одлука на Советот на ЕУ за почеток на преговори за членство, истакна министерот за надворешни работи Антонио Милошоски во обраќањето на неформалниот состанок на Процесот за соработка во Југоисточна Европа.
Шефот на дипломатијата притоа додаде дека се надева дека нашите соседи-членки на ЕУ, Грција и Бугарија, ќе го препознаат својот интерес и оти ќе настојуваат да добиеме позитивна одлука од Советот, потврдувајќи ја на тој начин декларативната поддршка.
- Ја поздравуваме новата клима за преговори на Хрватска и овој пример покажува колкав може да биде придонесот на дијалогот. Искрено се надеваме дека Турција ќе направи исто така пресврт во преговорите со ЕУ, рече Милошоски и додаде оти Македонија е подготвена да го пренесе своето искуство во делот на евроинтеграциските процеси на Албанија, БиХ, Косово, Црна Гора и Србија, како и во однос на визната либерализација.
По состанокот, што заврши синоќа, шефот на дипломатијата имаше неформални средби со неговите колеги од Албанија и од Србија, Илир Мета и Вук Јеремиќ.
Милошоски го откажа своето учество на 12. Конференција на Балканскиот политички клуб, што се одржува денеска во Истанбул и ќе се врати во Скопје каде ќе присуствува на отворената седница на Владата.
На Конференцијата на Балканскиот политички клуб присуствуваат македонскиот амбасадор во Белград, Љубиша Георгиевски и поранешниот македонски премиер Љубчо Георгиевски.