Скопје, 13 октомври (МИА) - Енциклопедијата нема да биде целосно повлечена туку ќе се вршат само исправки во одредниците кои изминатиот месец ја разбрануваа јавноста.
Тоа е ставот од денешната седница на Собранието на Македонската академија на науките и уметностите, која е прекината по три и пол часовна дебата.
Академик Ѓеорги Старделов по седницата изјави дека расправата била конструктивна и сериозна и ќе овозможи да се најде патот до решението, што како што вели ќе биде автономно.
- Јавноста е премногу исполитизирана во однос на оценките што се дадени за нашата енциклопедија. Ние се обидуваме да создадеме свој однос кон неа и тоа го правиме автономно без каков било притисок на која било политичка гарнитура или политичко влијание, рече Старделов.
На продолжението на седницата што ќе се одржи во текот на идната недела ќе се расправа за финалните заклучоци на Претседателството на Академијата и ќе се одлучува дали редакцискиот одбор ќе се менува или ќе се дополни со нови членови.
Првата национална енциклопедија свечено беше промовирана пред еден месец и предизвика реакции, пред се, од партиите на албанскиот политички блок во Македонија кои оспорија повеќе одредници во публикацијата и побараа корекција и запирање на нејзината дистрибуција.