Скопје, 15 октомври (МИА) - Решавањето на проблемот со името не е услов за пристапување на Македонија во Европската унија, но би создало многу попозитивна средина за продолжување на процесот на евроинтеграција на земјата, оценија денеска шведскиот амбасадор Ларс Фреден и евроамбасадорот Ерван Фуере.
- Ова е златна шанса да се направи поголем напор со цел да се разреши проблемот со името. Сега изгледа дека сликата е многу појасна. Единствените разговори кои што сега остануваат се оние во однос на прашањето за името, а не за одредниците, рече Фреден на презентацијата на Извештајот на ЕК пред ресорните собраниски комисии.
Фуере, пак, ја повтори вчерашната изјава на еврокомесарот за проширување Оли Рен од Брисел дека препораката треба да биде силен поттик и охрабрување конечно да се затвори прашањето за името и да се најде заеднички прифатливо решение во рамките на разговорите што се водат со посредство на ОН.
Амбасадорот Фреден, поздравувајќи го позитивниот извештај и препораката за почеток на преговорите од името шведското претседателство со ЕУ, посочи дека конечната одлука за старт на преговорите ја носи Советот на ЕУ со консензус. Осврнувајќи се на формалните чекори кои следат по препораката за почеток на преговорите, информира дека од денеска веќе заседава Комитетот за Западен Балкан при Советот на ЕУ за Извештајот за Македонија, кој треба да му помогне на Советот на 7 и 8 декември да се изјасни за датумот за преговори.
Во однос на визната либерализација, Фреден соопшти дека добро се одвиваат работите и во Европскиот парламент и во различните форуми на Советот на ЕУ и се надева оти на 1 декември ќе биде потврдена одлуката за укинување на шенгенската бариера за македонските граѓани.