Заврши снимањето на турските ТВ серии „Збогум Румелија“ и „Балканска свадба“

Скопје, 25 октомври (МИА) - Заврши снимањето на „Збогум Румелија“, ТВ серија во продукција на Сектор Филм од Македонија и Адам Филм од Турција, која две и пол години беше дел од секојдневието на 30 милиони гледачи како во Турција така и надвор од нејзините граници. 

„Збогум Румелија“ ја следи судбината на неколку семејства во периодот кога Отоманската империја ја губи својата надмоќ на Балканот и се повлекува од него, со што и тие се принудени да ги напуштат своите домови. Tокму гледаноста на оваа серија која го создаде параметарот за креирање успешна телевизиска серија, според двете копродукциски куќи, била причина да започне реализацијата и на втората серија „Балканска Свадба“, исто така наменета за турскиот пазар, а која зборува за проблемите на времето во кое живееме.

Според Мухарем Гулмез, извршен продуцент во Адам Филм – Истанбул, завршувањето на двете серии е само успешен старт на една соработка со македонските колеги. За Владимир Анастасов, продуцент од Сектор Филм – Скопје, формулата за успехот е ефикасната тимска работа и професионалноста на екипите.  

За период од две и пол години во снимањето на двеет серии беа ангажирани над стотина актери и над 250 членови на техничка екипа од Македонија и Турција. Снимени се 83 епизоди од серијата „Збогум Румелија“ и шест од „Балканска свадба“. Освен во Битола и нејзината околина, се снимаше и во Охрид, Ресен и Скопје. Буџетот за овие проекти изнесуваше околу осум милиони евра.