Њујорк, 5 ноември (МИА) - Медијаторот Метју Нимиц најави продолжување на разговорите за решавање на разликите меѓу Атина и Скопје околу уставното име на Република Македонија. Прес-службата на ОН соопшти дека Нимиц е во контакт со двете страни и оти им предложил средба во Њујорк за деновите од неделата што почнува од 16-ти ноември.
Ваквиот чекор на Нимиц следува по вчерашната изјава на генералниот секретар на Светската организација Бан Ки-Мун во Атина дека медијаторот е подготвен да ги продолжи разговорите за решавање на спорот за името штом двете страни искажат подготвеност за тоа.
Првиот човек на ОН изрази надеж дека двете страни со помош на Нимиц ќе дојдат до конечно решение за спорот.
Разговорите за името привремено беа замрзнати поради изборите во Грција. Нимиц по средбата со македонскиот претседател Ѓорге Иванов во септември во Њујорк најави дека повторно ќе го активира дијалогот штом заврши изборната кампања во Грција и оти изнел „доволно идеи на маса за двете страни да почнат да размислуваат креативно за изнаоѓање решение“.