Скопје, 5 ноември (МИА) - Македонското Министерство за надворешни работи го поздравува предлогот на Словенија за укинување на визите за Македонија, Србија и Црна Гора од 19 декември годинава.
Словенечкиот предлог, како што велат во МНР, оди во прилог на заложбите за побрзо симнување на шенгенската визна бариера за државите во регионот.
Словенија на вчерашниот состанок на групата на Европскиот совет задолжена за визната либерализација предложи шенгенскиот визен режим за Македонија, Србија и Црна Гора да биде укинат од 19 декември оваа година, наместо на 1 јануари 2010 година како што предлага Европската комисија.
- На овој начин граѓаните од тие земји ќе бидат во можност без виза да патуваат во шенгенските земји веќе пред Божиќ и Нова година, се наведува во соопштението кое денеска го објави Министерството за надворешни работи на Словенија.
Предлогот во најкус временски рок ќе го разгледа Европскиот парламент, а одлуката за тоа Европскиот совет би требало да ја усвои во средината на ноември, пренесува агенцијата СТА.
Министерството потсетува дека Србија и Црна Гора мораат да почекаат друг ивештај од групата задолжена за либерализација, но оценува дека „не треба да се очекуваат никакви проблеми“.