Брисел, 10 ноември (МИА) - Македонскиот министер за надворешни работи Антонио Милошоски денеска во Брисел ќе има излагање пред Комисијата за надворешни работи на Европскиот парламент.
Милошоски ќе ги реафирмира постигнувањата на Република Македонија во имплементацијата на приоритетите на Европското партнерство и на Копенхашките критериуми за членство, кои неодамна беа потврдени и во Извештајот на Европската комисија и ќе побара поддршка за определување датум за почеток на преговорите за членство согласно препораката на Европската комисија.
Во текот на посетата на Европскиот парламент шефот на македонската дипломатија ќе има средби со европратеници, меѓу кои со претседателот на Комисијата за надворешни работи Габриеле Албертини, со известителот за Македонија Зоран Талер, известителот во сенка од редовите на Европската народна партија Едуард Кукан, како и со претседателот на Делегацијата на Европскиот парламент во Мешовитиот парламентарен комитет на Република Македонија и Европската унија, Јорго Шацимаркакис.