Скопје, 12 ноември (МИА) - Македонската Православна Црква во рамки на своите активности денеска ќе одржи редовен годишен Архиепископски Црковно-народен собор во Соборниот архиепископски храм „Св.Климент Охридски” во Скопје.
Главни теми на Соборот, соопшти Канцеларијата на архиепископскиот Управен одбор на Македонската православна црква, ќе бидат измените и дополнувањата на Уставот на МПЦ, а заради усогласување со позитивните закони во Република Македонија, како и резултатите од процесот за денационализација.
На Соборот ќе учествуваат претставници од сите епархии и институции на МПЦ.
Покрај работниот, ќе има и свечен дел, во рамките на кој ќе биде промовирано Светото Евангелие за богослужбена употреба. Архиепископскиот Црковно-народен собор ќе почне во 8 часот со света архиерејска литургија и призив на Светиот Дух.