Скопје, 25 ноември (МИА) - Во врска со вчерашните повици за дообјаснување на детаљите од минатонеделниот разговор на македонскиот и српскиот претседател Ѓорге Иванов и Борис Тадиќ, Кабинетот на шефот на државата Иванов упатува на заедничкото комунике на двајцата претседатели дадено по средбата.
- Претседателот Иванов како основа на договорот за демаркација на границата со Република Косово го посочи договорот потпишан од страна на Претседателот Борис Трајковски и Претседателот Воислав Коштуница во 2001 година, помеѓу Република Македонија и тогашна Сојузна Република Југославија, и само во тој контекст истиот договор беше споменат на средбата. Претседателите Иванов и Тадиќ на разговорите констатираа несогласување околу статусот на Косово, што беше нотирано и во заедничкото комунике, се вели во соопштението од Кабинетот на македонскиот претседател.