Скопје, 15 декември (МИА) - Министерот за здравство Бујар Османи тврди дека има доволно вакцини против грипот од типот А (H1 N1) и оти ќе нема јаз во количините во пресрет на најавената за утре набавка на дополнителни 80.000 вакцини.
- Нема да постои јаз во количините. За денеска има доволна количина за покривање на потребите на граѓаните, а дополнителни 80.000 пристигнуваат утре, изјави Османи, одговарајќи на новинарски прашања по тркалезната маса за проекти за енергетска ефикасност на јавни згради.
Османи рече дека во случај да недостигаат вакцини во некој од градовите граѓаните можат да дојдат во Скопје да се вакцинираат.
- Денеска ќе има доволно вакцини за граѓаните. Државата има обезбедено пристап до вакцини во количини колку што ќе бидат потребни и колку што ќе има интерес од граѓаните, изјави министерот за здравство и повторно упати апел дека вакцинирањето е еден од најефикасните начини за спречување на последиците од грипот.