Софија, 15 декември (МИА) - Македонските државјани од 19 декември ќе можат без визи да влегуваат во Бугарија, но само ако поседуваат биометриски пасоши. Оние со стари патни исправи и натаму ќе мора да вадат визи, соопшти бугарското Министерство за надворешни работи.
Државјаните на Македонија ќе можат да престојуваат во Бугарија најмногу до 90 дена во тек на шест месеци. За подолг престој е неопходна соодветна долгорочна виза.
Бугарија не е дел од Шенген зоната, но ги применува правилата од шенгенскиот систем.
Стартот на безвизниот режим, в сабота на граничниот премин Деве Баир – Ѓуешево ќе го одбележат претседателите на Македонија и на Бугарија Ѓорге Иванов и Георги Прванов, со симболично заедничко дигање на граничната рампа.
Иванов и Прванов, потоа ќе заминат за Банско каде што ќе имаат тет-а-тет средба.