Скопје, 22 декември (МИА) - Во изминатото деноноќие од компликации на бронхопневмонија на Клиниката за инфективни болести во Скопје почина еден пациент (1950) со потврден грип А (Х1Н1), соопшти Министерството за здравство. Починатиот пациент е 16. жртва на новиот грип во Македонија.
Пациентот бил хоспитализиран на Клиниката на 19 декември со симптоми на грип (студ, треска, стегање во градите и тешко дишење). Веднаш му е дадена соодветна антивирална терапија и ставен е на респиратор. По три дена дошло до нагло влошување на состојбата и констатирана е смрт вчера доцна попладне. Пациентот претходно боледувал од белодробно заболување, дијабетес и од ревматоиден артритис.
Во изминатите 24 часа на Клиниката за инфективни болести се хоспитализирани четири нови пациенти со симптоми на грип и таму во моментот се лекуваат 64 лица. Здравствената состојба на новопримените пациенти е стабилна. Четири пациенти се со потешка клиничка слика и се ставени на респиратор.
На инфективното одделение во Воената болница е хоспитализиран еден нов пациент и таму вкупно се лекуваат 17 лица со симптоми на грип.
На Клиниката за детски болести во Скопје се примени девет нови пациенти и таму во моментов болнички се лекуваат 46 деца на возраст од шест месеци до пет години. Сите новопримени пациенти се во стабилна здравствена состојба, освен едно дете кое е со потешка клиничка слика.
На Институтот за белодробни заболувања кај децата-Козле, во изминатото деноноќие се хоспитализирани две деца со полесна форма на пневмонија и таму во моментот се лекуваат 27 деца.