Скопје, 13 јануари (МИА) - Македонскиот е службен јазик за целата територија на Република Македонија. Припадниците на заедниците имаат право да учат на својот мајчин јазик, но тоа не исклучува да учат македонски јазик од прво одделение, изјави министерот за образование Никола Тодоров по најавите дека во општините со мнозинско албанско население првооделенците Албанци ќе ја бојкотираат наставата во второто полугодие зашто нивните родители не сакаат тие да учат македонски јазик од прво одделение, туку од трето, како што беше до оваа учебна година.
Тодоров рече дека бојкотот е неодговорност кој ќе резултира со проблеми за учениците и за наставниот процес.
- Непоимливо е, а дури помалку и неодговорно од оние кои на локално ниво треба да го менаџираат образованието, да повикуваат на бојкот на образовниот процес. Бојкотот не може да донесе прогрес и да ги реши проблемите, туку само нив да ги продлабочи и да ги стави учениците во многу непријатна и несоодветна положба. Како министер, со цел мој интегритет, ќе се трудам да не дозволам учениците да изгубат ниту еден ден од наставата во второто полугодие, изјави Тодоров по промоцијата на новите наслови од проектот за превод на 500 стручни книги.
- Непоимливо е македонскиот да се изучува од трето или четврто, а англискиот во прво одделение во земја во која македонскиот јазик е службен за целата држава, додаде министерот за образование и наука.